قصيدة يحسدوني ان لي باقي عقل

يحسدوني ان لي باقي عقل          
          في زمن انصاف أفراده جنون
ما دروا أني على حد الهبل           
          فاقده صبري وتدليل الحنون
لي حبيبٍ نصف شفاته عسل          
          ونصفها سُكر على بيض السنون
والبقيه كل من منها وصل           
          داخ في فكرة أكون او لا أكون
رمش عينه قبل لا أحكي فعل          
          عسكري أدى التحيه بالعيون
كل ما إني أشوفه متصل           
          أشعر برعشه تقل لحظة منون
والله إني كيف أشعر بالملل          
          وهمس صوته ممتزج لهفه وشجون
قبل لا أشكي واقول اللي حصل          
          لي من أسبابه وأعددله الطعون
ضمني في وسط صدره بالعجل          
          وإعتذر من قبل لا الزله تكون
من يلوم اليوم لو عقلي فصل          
          وصّرحت سوسن بانه اللي يمون
ومن يعاتبني إذا مره حصل          
          وقمت أتغزل وأبدع بالفنون
صاحبي لا يمكن تضمه الجمل          
          أكبر من البوح ومن رسمه بلون
إفهموني كيف شرحي يكتمل          
          والعطر ريحه وأنفاسه دخون
والختام اعوذ من شعر الغزل          
          جابلي دوخه وصابتني العيون
للسوسنه